2022 წლის 1 ივნისს, წმიდა მოციქულთასწორ ნინო ქართველთა განმანათლებლის ხსენების დღეს, ქუთათელ-გაენათელმა მიტროპოლიტმა იოანემ (გამრეკელი) საღმრთო ლიტურგია აღავლინა ქუთაისის წმიდა ნინოს სახელობის ტაძარში (თაბუკაშვილის ქუჩაზე მდებარე), სადაც წარმოთქვა ქადაგება და განაცხადა:
“ჩვენმა ხელისუფალმა, პრემიერმა შეხვედრაზე უცხოეთში თქვა, რომ ევროინტეგრაცია კარგია, მაგრამ ამდენი წელია ჩვენ ამაზე ვსაუბრობთ და საქმეზე ხომ არ გადავიდეთო? კონკრეტულად ხალხს რა ვუთხრათო? იმიტომ, რომ ეს რომ იწელება დროში, ხალხს უკვე იმედი აღარ აქვს, რომ თქვენ ეს გინდათ. კი, კი გავითვალისწინებთო… და გაითვალისწინეს და ისეთი რამ შესთავაზეს ქართველ ერსა და ქვეყანას, რომ ნამდვილად ამაზე უარს იტყვიან ჭეშმარიტი ქართველები და ქრისტიანები და მაშინ საბაბი ექნებათ, ევროპაში როგორ შემოგიშვათ თქვენო, როგორი ჩამორჩენილები ხართო. ჩვენ ვართ ჩამორჩენილები?! ისინი?! …მაგრამ გააჩნია, რომელ გზაზე ჩვენ ჩამოვრჩით და რომელ გზაზე ისინი /ევროპელები/ წარმატებულნი არიან…
ჩვენ გვეუბნებიან ამაზე /სახარებასა და ქრისტიანულ ცხოვრებაზე/ უარი თქვითო… ახლა ევროპული ღირებულებებია… ეს სადაური ტერმინია? გეოგრაფიული ტერმინი ღირებულებებზე ლაპარაკობს?! ევროპული… მაშინ, აზიურიც იყოს, აფრიკული იყოს, სამხრეთ ამერიკული, ჩრდილო ამერიკული… ანტარქტიდისაც ხომ შეიძლება?! ისიც ხომ კონტინენტია?! რა ღირებულებებზე მელაპარაკებით? ევროპა, რომელიც წარმართობაში იყო, იმის ღირებულება? თუ ქრისტიანული როცა იყო?! თუ, როცა კათოლიკეები ინკვიზიციით რომ წვავდნენ ადამიანებს კოცონზე?! რომელ ევროპაზე მელაპარაკებით თქვენ?! რომელ ევროპულ ღირებულებებზეა საუბარი?! დღევანდელი ევროპის ღირებულებებზე?! მაგრამ საფუძველი რა არის? ჩამოთვალოთ: დამპყრობლობა – აფრიკა, ამერიკა დაიპყრეს; კარგი, დაიპყრეს და აითვისეს, მაგრამ ადგილობრივი მოსახლეობა ამოხოცეს, რასისტული იყო. მუშახელი რომ დააკლდათ ამერიკაში, აფრიკიდან ათ მილიონზე მეტი ზანგი მონად გაყიდეს, რომ იქ ემუშავათ. ეს არის ევროპული ღირებულებები?! სისასტიკე იქ მყოფ ინდიელებს, სხვადასხვა ტომს, აფრიკელებს… ადამიანებად არ თვლიდნენ, თუ ნახევრად რაღაცებად?! ეს ხომ რასიზმია უკვე. საიდან წამოვიდა ათეიზმი? – ევროპიდან. ფაშიზმი? – ევროპიდან. მსოფლიო ომები? – ევროპიდან. რომელ ევროპულ ღირებულებებზე ვლაპარაკობთ ჩვენ?! ამიხსენით, რას გულისხმობენ?! უკაცრავად, გარყვნილებას, რომელიც დღეს ევროპაში დაკანონებული არის, ამ ღირებულებებზე ვლაპარაკობთ?! ჩვენ ულტიმატუმს გვიყენებენ, რომ თქვენ თუ ამას არ მიიღებთ, ევროპაში არ მიგიღებთო… ჩვენ პატარა ქვეყანა ვართ, ჩვენ ცოტა ვართ და შეიძლება ჩვენ დაგვჩაგრო?! და უარი გვათქმევინო ჩვენს განვლილ ორი ათასწლოვან გზაზე?! ამას დემოკრატია ჰქვია ხომ? თუ დემოკრატია შეწყნარებაა განსხვავებული აზრისა, მაშ, შემიწყნარე მე, განსხვავებული აზრი მაქვს. არა, ჩემის შეწყნარება არ შეიძლება… ეს არის დემოკრატია?!… რომელ ევროპულ ღირებულებებზე ვლაპარაკობთ, სოკრატეს, ალკიბიადეს თუ ვისი?!
ჩვენ დღეს ვდგავართ არჩევნის წინაშე: გავაგრძელოთ ქრისტეს გზა, ამ გზით ვიაროთ თუ წარმავალ რაღაც ღირებულებებზე, რომლებსაც ევროპულს ეძახიან?! ევროპაში მრავალი ღირებულება იყო და დღესაც არის. რომელზე? ეს ერის პოლიტიკური ღირებულებები და არა ზნეობრივი, არა სარწმუნოებრივი და არა ქრისტიანული… ვარსქენმა პოლიტიკური მოსაზრებით შეიცვალა სარწმუნოება და ცეცხლთაყვანისცემას დაუბრუნდა და შესაბამისად ღირებულებათა სისტემაც შეიცვალა და თავისი მეუღლე შუშანიკი აწამა. აი, მოდით, დავარქვათ ყველაფერს თავისი სახელი! ნუ გვეცილებიან ჩვენს არჩეულ გზაზე! მიგვიღონ, როგორიც ვართ. ჩვენ არ ვიყავით რასისტები, ჩვენ არ ვიმონებდით ვინმეს, ჩვენ არ ვართმევდით ტერიტორიებს არავის, ჩვენ მონების ყიდვა არ გვქონდა დაკანონებული… ჩვენ ყოველთვის ვიყავით მსხვერპლი, მსხვერპლი ღვთისათვის შეწირული ჩვენი ჭეშმარიტი სარწმუნოებისათვის. და დღეს ე.ი. რა ავირჩიოთ?! ვარსქენის გზა ავირჩიოთ?! თუ რომელი?! აი, ვდგავართ ჩვენ ამ გზის გასაყარზე”, – განაცხადა მიტროპოლიტმა იოანემ.
