„ეს სირცხვილი უნდა გახდეს! რესტორნის მეპატრონეს თუ ტაქსის მძღოლს უნდა შერცხვეს, რომ რუსულ მუსიკას, მით უფრო, საკმაოდ მდარე ხარისხის რუსულ მუსიკას უსმენს“, – ამბობს ასოციაციის თავმჯდომარე გიგა კობალაძე.
მისი თქმით, რუსული მუსიკა საჯარო სივრცეში ორი მიზეზის გამო ისმის: ინერციით, რადგანაც ოდესღაც საბჭოთა სამყაროს ვეკუთვნოდით და რუსი ტურისტების საამებლად.
„სამწუხაროდ, ჩვენ რუსული წარსული გვქონდა და ეს ინერციით მოგვყვება, მაგრამ თუ საზოგადოება ამას არ შეეწინააღმდეგა, სულ ასე იქნება. ეს სახელმწიფო ჩვენი მტერია და ვისაც რა შეუძლია, უნდა გააკეთოს იმისთვის, რომ რუსეთის გავლენა შემცირდეს, მით უფრო ახლა, როცა ევროკავშირის კანდიდატობის წინაშე ვდგავართ. ჩვენ შეგვიძლია მუსიკოსები ჩავრთოთ ამ კამპანიაში, მათ თავის მხრივ თავიანთი ფანები აიყოლიონ“, – ამბობს გიგა კობალაძე.
კამპანიის ორგანიზატორები აპირებენ მიმართონ სატრანსპორტო კომპანიებს, რესტორნებს, სხვა დაწესებულებებს და მოუწოდონ, არ ჩართონ რუსული მუსიკა. ასევე გეგმავენ ამავე სლოგანით გამართონ კონცერტები თბილისსა და აჭარაში, სადაც ტურისტული სეზონის დროს რუსული მუსიკა ყოველ ნაბიჯზე ისმის. გიგა კობალაძე ამბობს, რომ კამპანია უკვე ათასობით ადამიანმა მოიწონა და სასურველია, მასში ყველა ჩაერთოს.