სამედიცინო საქმიანობის რეგულირების სააგენტოს დირექტორის, ზაალ კაპანაძის განცხადებით, 27 წლის ექთნის გარდაცვალების საქმეზე მოკვლევა ორი მიმართულებით მიმდინარეობს. კერძოდ, მისი თქმით, იკვლევენ, რამდენად ჰქონდა კლინიკას ვაქცინაციის ჩასატარებლად შესაბამისი ტექნიკური და ინფრასტრუქტურული აღჭურვილობა, ასევე რამდენად დროული იყო დახმარება
„ჩვენ ვიკვლევთ ორი მიმართულებით – რამდენად იყო კლინიკაში ინფრასტრუქტურული და ტექნიკური აღჭურვილობა, რომ ვაქცინაცია ჩატარებულიყო, მეორე ნაწილია, გვერდითი მოვლენისას რამდენად დროული იყო მათი ქმედებები. ჩვენ ამ ორივე მიმართულებით შესწავლას ვაგრძელებთ“, – აღნიშნა ზაალ კაპანაძემ.
კაპანაძის განმარტებით, უკვე გამოიკითხა მედპერსონალი.
„პარალელურად მიმდინარეობს ექსპერტიზის მომზადება, ასევე პოლიცია აწარმოებს გამოძიებას და ჩვენ მათთან კოორდინაციაში ვართ. ექსპერტიზის დასკვნა რომ გვეცოდინება, ჩვენც აქედან გამომდინარე დავდებთ დასკვნას. ჩვენ ვსწავლობთ დოკუმენტურ ნაწილს, გამოძიება კი სხვა კუთხით, დამდგარ შედეგთან დაკავშირებით მუშაობს“, – განაცხადა ზაალ კაპანაძემ.
სამედიცინო საქმიანობის რეგულირების სააგენტოს დირექტორის ინფორმაციით, კლინიკა სტანდარტებით არსებულ მოთხოვნებს შეესაბამებოდა და პაციენტის დამძიმების დროს პროტოკოლით გათვალისწინებული ყველა მოქმედება განხორციელდა.
