საქართველოს მთავრობამაც და ქართველებმაც ზუსტად, მკაფიოდ გამოხატეს და გაუგზავნეს გზავნილი მსოფლიოს, სად დგანან, – ამის შესახებ გერმანიის საგარეო საქმეთა მინისტრმა, ანალენა ბერბოკმა საქართველოს საგარეო საქმეთა მინისტრთან, ილია დარჩიაშვილთან ერთად გამართულ პრესკონფერენციაზე განაცხადა.
ამასთან, ანალენა ბერბოკს კითხვა დაუსვეს: „როგორ აფასებთ საქართველო-რუსეთის ამჟამინდელ ურთიერთობებს, არსებობს პირდაპირი ფრენებისა და კომუნიკაციის აღდგენის მცდელობა“.
„ამ კითხვას ძალიან მოკლედ ვუპასუხებ. იყო მკაფიო სიგნალი, რომ საქართველომ გასული წლების განმავლობაში, არა მხოლოდ გაერო-ს გენერალური ასამბლეიდან 2022 წლის მარტში, არამედ მიმდინარე წელსაც მხარი დაუჭირა ამ რეზოლუციას, რომელიც ცალსახად ამბობს, ვინ არის აგრესორი – ეს არის რუსეთი; ვინ არის მსხვერპლი – ეს არის უკრაინა და როგორ გამოიყურება სამშვიდობო გეგმა. ეს არის რუსული სამხედრო ქვედანაყოფების გაყვანა და ცეცხლის შეწყვეტა უკრაინის მთელ ტერიტორიაზე. ჩემი აზრით, საქართველოს გადმოსახედიდან, ეს არის ის რეალობა, რომ რუსეთი ძალიან უხეშად, პერმანენტულად არღვევს გაერო-ს ქარტიას, ასევე ეუთო-ს მცდელობებს ამ საკითხის მშვიდობიანად დარეგულირებისთვის. მეზობლებისთვის ეს არის უდიდესი გამოწვევა, უფრო დიდი გამოწვევა, ვიდრე სხვა ადგილას, გეოგრაფიულად სხვა ტერიტორიაზე მდებარე ქვეყნებისთვის. სანქციების მხარდაჭერის, მაგალითად, ფრენების შეწყვეტის მხრივ, ევროკავშირის მხრიდან არაფერი შეცვლილა და ალბათ საქართველოს მხრიდანაც“, – განაცხადა ანალენა ბერბოკმა.
