დიდი ალბათობით, მიქაუტაძე მალე დაბრუნდება – ბელგიაში შვებით ამოისუნთქეს

მიქაუტაძის თამაში ესპანეთთან და საბერძნეთთან მაშინვე გამოირიცხა. ორშაბათს კი სერენის შემტევი ბელგიაში დაბრუნდა. ბელგიური წყაროს ინფორმაციით, მიქაუტაძის დაზიანება მსუბუქია და ის დაახლოებით 2 კვირას გამოტოვებს. “უფრო კონკრეტულად მისი დაზიანების შესახებ მოგვიანებით გვეცოდინება”, განუცხადა El Balón Belga-ს სერენის მწვრთნელის ასისტენტმა მარკ გროსჟანმა.

თავიდან მიქაუტაძის პოსტიდან ბევრმა დაასკვნა, რომ მას აპრილში დასვენება მოუწევდა: “მოგესალმებით ყველას. სამწუხაროდ, ჩემი ერთგული გულშემატკივრებისთვის ცუდი ამბავი მაქვს. საქართველოს ნაკრებთან ერთად მსოფლიოს 2022 წლის ჩემპიონატის საკვალიფიკაციო ეტაპის მატჩებთან დაკავშირებით ჩემი გეგმები ტრავმის გამო შეიცვალა. აპრილში ვერ ვითამაშებ. თუმცა ძალიან მიხარია, რომ საქართველოს ნაკრებში ჩემი დებიუტი შედგა! მადლობა ფედერაციას და მთელ გუნდს. მაგრამ არაფერი დასრულებულა! მალე შევხვდებით ახალი თავგადასავლებისთვის,” – წერდა ის ინსტაგრამზე.

დიდი ალბათობით, მიქაუტაძე სერენის ორ უახლოეს მატჩს გამოტოვებს: 3 აპრილს სტ. ჟილუასთან (რომელიც უკვე ჩემპიონია და ჟუპილერ ლიგაში ითამაშებს) და 10-ში დეინზეს წინააღმდეგ. შესაძლოა, ის გუნდს 17-ში ლიერსთან დაუბრუნდეს.

წყარო : popsport.com